O grupo provincial do PSOE acusou ao presidente da Deputación de Pontevedra, Luís López, de "mentir abertamente" na rolda de prensa na que deu conta da aprobación de 280.000 euros en fondos destinados a fomentar o emprego nos concellos de Rodeiro e Vilanova de Arousa. Segundo indican os socialistas, así "queda acreditado" na acta da sesión da Xunta de Goberno do pasado 1 de setembro, que vén de facerse pública, e na que consta que "os fondos que López fixo pasar como un acordo novidoso foron, en realidade, aprobados na Xunta de Goberno do 24 de xaneiro pasado, presidida por Carmela Silva".
O voceiro do grupo provincial socialista, Carlos Font, subliña que se trata de dúas achegas regradas da Liña 3 do Plan Concellos 2023, é dicir, a que financia os plans locais de emprego nos 59 municipios da provincia de menos de 50.000 habitantes, "cousa que López ocultou".