O Concello de Ribadumia remata o mes de marzo achegando programación cultural e de entretemento á veciñanza do municipio e arredores no Auditorio Municipal. Esta fin de semana, a oferta será de carácter musical.
O sábado, a partir das 20.30 horas, a Banda de Música Municipal de Ribadumia ofrecerá un concerto de solistas de clarinetes, trombón en frautas, dirixido por Alberto Rocha.
O domingo, a partir das 20.00 horas, continuará a oferta musical da programación coa actuación do grupo Cantareiras Madialeva, onde fusionarán a tradición galega con letras frescas e pícaras. A diferencia doutras pandeireteiras, as Madialeva non cantan ao unísono, senón que mesturan percusión tradicional coa polifonía para darlle diferentes tons a todas as súas cancións.
Ambas sesións serán de balde, e libres ata completar o aforo do Auditorio, recomendadas para todos os públicos. O Concello de Ribadumia anima a todos os veciños/as e achegados a asistir durante a fin de semana ás sesións organizadas, onde o entretemento e a música clásica e tradicional serán as grandes protagonistas.
Para estar ao tanto do resto da programación, a veciñanza poderá consultar os dípticos informativos que se enviaron aos domicilios de Ribadumia e dispoñibles nas oficinas municipais, nas redes sociais ou na páxina web municipal.