O novo centro de saúde de Vilagarcía de Arousa, que contará con 5.700 metros cuadrados e que ampliará nun 55% ao actual, continúa coa súa materialización. O goberno local eleva ao Pleno a proposta para ceder ao Sergas os terreos municipais da antiga Comandancia co obxecto de que o organismo autonómico acometa a construción do correspondente centro de saúde. Co acordo, que se adoptará na sesión ordinaria prevista para o 31 de agosto, completa o trámite que lle competía realizar á administración local para facilitar a dotación da necesaria infraestrutura sanitaria comprometida pola Xunta de Galicia. A partir de agora, será o Sergas quen teña que continuar co proceso sobre o que o executivo local estará vixilante para que non se demore máis do necesario.
A cesión da parcela adquirida polo Concello faise de forma gratuíta, condicionando o seu uso á construción do centro de saúde. Trátase do solar que antigamente ocupaba a Comandancia Militar de la Marina e que conta cunha superficie de 4.564 metros cadrados de superficie e con fachadas á avenida da Mariña e á rúa Elpidio Villaverde.
Para obter os terreos, aproveitando o cambio de presidencia da Autoridade Portuaria, o executivo presidido por Alberto Varela iniciou conversas a tres bandas co Porto e coa Consellería de Sanidade. As xestións materializáronse nun acordo que permitiu que o Concello adquirise o solar por 1.157.406 euros a cambio de que o Porto liberalizase O Ramal, condicións fixadas no protocolo ao que se sumou a administración autonómica comprometéndose, así mesmo, a redactar o proxecto e financiar o novo ambulatorio.
Antes de poñer os terreos a disposición do Sergas, o Concello tivo que demoler as antigas instalacións militares, traballos que supuxeron un desembolso de 150.000 euros.
Fondos europeos para financiar o presuposto de 14 millóns de euros
A construción do novo centro de saúde está presupostada en 14 millóns de euros que a Consellería financiará con fondos da Unión Europea. O anteproxecto foi presentado a principios de ano ao executivo local que acolleu con agrado o moderno deseño. Malia isto, propuxo a adopción de pequenas melloras na accesibilidade interna do inmoble, en concreto a instalación dun segundo ascensor, ao considerar que o único equipamento previsto non era suficiente para un centro que dobrará a superficie do actual e que contará cun importante volume de usuarios.
Segundo comunicaron no seu día os responsables de Sanidade, a previsión é que o novo centro estea construído no prazo de tres anos, aspecto sobre o que o goberno local estará pendente para axilizar o proceso. De feito, segundo o comentado polos responsables autonómicos, a obra debería estar a punto de licitarse. Tan pronto como se aprobe a cesión dos terreos ao Sergas, o alcal de solicitará información para coñecer o estado actual da tramitación e os prazos que manexa a Consellería. O executivo local confía en que a Xunta axilice ao máximo o proxecto, tal e como prometeu no seu día o conselleiro de Sanidade cando visitou Vilagarcía para asinar o protocolo.
