Ata duascentas persoas maiores de 65 anos que acrediten a súa residencia en Vilagarcía poderán participar, de xeito gratuíto, nas visitas guiadas á Illa de Cortegada, pertencente ao Parque Nacional das Illas Atlánticas. O prazo de inscrición ábrese o vindeiro mércores, día 15, e permanecerá aberto ata o día 24, de xeito presencial, nas dependencias da Área de Maiores (baixo da Casa Consistorial), en horario de 9.00 a 13.00 horas. As inscricións serán individuais, e tendo en conta que para cada saída hai unicamente vinte prazas. A primeira saída será o domingo da vindeira semana, día 19. A partir de aí haberá outras 9 expedicións máis, ata completar así as 200 prazas.
A empresa local Corticata, especializada precisamente no coñecemento e a divulgación da illa de Cortegada, será a encargada de xestionar a iniciativa, dende o traslado dende o peirao do Carril ás visitas guiadas pola illa. A duración da actividade será de aproximadamente dúas horas e media, con saídas ás 11:00 horas ou ás 16:30.
O calendario previsto, que podería sufrir modificacións en función do tempo, é este:
- Marzo: domingo 19, ás 11.00 horas; domingo 26, 16.30 horas.
- Abril: domingo 2, 11.00 horas; venres, sábado e domingo de Semana Santa (7, 8 e 9), sempre ás 16.30; domingos 16 e 30, ás 11.00 horas.
- Maio: domingo 14, ás 11; domingo 21, ás 16.30; e domingo 28, ás 11.00.
A actividade forma parte do Plan de Recuperación, Transformación e Resiliencia que se deseñou o Goberno de España con fondos europeos, que neste caso xestiona a Xunta de Galicia.
