A Xunta vén de rematar os traballos de desmontaxe do taboleiro da ponte de Ponte Arnelas. Unha vez finalizada a desmontaxe, as actuacións están a centrarse actualmente no inicio das cimentacións das pilas, uns traballos que se prolongarán durante as vindeiras semanas. De xeito paralelo, está avanzando a fabricación en taller da nova estrutura metálica da nova ponte, que será colocada posteriormente.
Esta intervención, no seu conxunto, foi avanzando a bo ritmo desde o principio, acadando o apuntalamento da ponte, o arriostramento transversal e a desmontaxe dos pretís de formigón, así como a colocación de tubaxes provisionais de abastecemento. En canto á desmontaxe do taboleiro, foron necesarios cortes perpendiculares para proceder á retirada por pezas.
Todas estas tarefas enmárcanse na solución definitiva para a reconstrución da ponte, xa trasladada aos concellos de Vilanova de Arousa e de Ribadumia, que suporá un investimento autonómico de máis de 5,3 millóns de euros.
Cómpre lembrar que, tras detectarse en abril danos en varias péndoas que provocaron que a calzada cedese parcialmente, a Xunta comezou a traballar para acometer esta intervención sobre o treito do río, que suporá mudar a tipoloxía e a fisionomía da ponte, que perderá o seu arco e os seus tirantes, pero gañará notablemente en estética e integración.
