As persoas maiores de Vilagarcía teñen este ano unha cita propia na programación de Nadal do Concello. A Concellería que dirixe Tania García organiza unha chocolatada para maiores o vindeiro venres, 22 de decembro, a partir das 17.30 horas na Praza da Peixería. A entrada é libre e de balde (ata completar aforo) para os veciños e veciñas pertencentes a este colectivo de idade.
Os asistentes á festa poderán degustar unha boa cunca de chocolate quente acompañada de rosca , servido todo polo cátering Senín, que tamén se encargou do xantar da romaría de verán. Como non podía ser doutro xeito, a merenda estará amenizada polo DJ Óscar, que porá música para crear ambiente e para que, quen o desexe, se anime a botar un baile.
Esta chocolatada é unha das iniciativas de carácter lúdico que promove a Concellería de Persoas Maiores co obxecto de crear espazos de convivencia nos que as persoas de máis idade teñan máis oportunidade de interactuar e de levar unha vida social activa e gratificante. Ademais, con esta actividade de Nadal preténdese crear un marco no que os maiores poidan confraternizar e celebrar estas datas tan especiais xunto cos seus amigos e coñecidos.
Xunto con este tipo de iniciativas, o departamento organiza ao longo do ano outras actividades que engaden contidos culturais, como as viaxes e excursións; e aquelas que inciden no benestar físico e psíquico dos maiores, como os programas de prevención da dependencia, entre outros.
