A programación do Vilagarcía, Cidade de Libro segue incorporando sorpresas e importantes atractivos, como a batalla de galos que se desenvolverá o martes, 14 de xuño, na Praza da II República, para quentar o ambiente de cara ás Conversas ao Solpor que ese día protagonizará o rapeiro e escritor madrileño Rayden. Como petisco á súa intervención, os freestylers galegos Marck e Ruvix encerellaranse nunha animada liorta, en verso e a ritmo de hip hop, para poñer de manifesto a potencia e o potencial do que moitos chaman a "poesía urbana". A posta en escena completarase coa intervención do speaker Risk.
Marck e Ruvix son dous membros de Gallos del Norte, a primeira plataforma de freestyle galego creada co obxectivo de profesionalizar unha disciplina que milleiros de mozos e mozas viven con paixón. Co lema de "Galicia rima unida", o colectivo promociona a artistas de freestyle, a speakers, DJs e músicos da denominada cultura urbana.
O xeito é o "flow" galego
Pola súa banda, o speaker que relatará a batalla é Risk, integrante do colectivo A Vella Escola, centrado tamén en promover e potenciar todas as disciplinas que se amparan baixo o paraugas da cultura urbana: Breakdance, Graffiti, Parkour, Skateboard, Beatbox, Turntablism Dj, Slackline, Rap, BMX, Roller, Street Workout, Freestyle Football, Scooter, Danzas de Rúa, Skimboard, pintado de Gorras Trucker, Tattoo… Risk fai bo o lema de "non temos flow… temos xeito".
O elemento aglutinador para ligar as rimas e os ritmos do hip hop coa literatura será Rayden. A súa presenza no evento Vilagarcía, Cidade de Libro enmárcase na xornada dedicada á relación entre música e literatura, dado que dende hai anos o madrileño combina estas dúas facetas de forma profesional, centrándose na escritura nos últimos tempos. De feito, despois de varias obras poéticas, vén de publicar a súa primeira incursión no xénero novelístico, a obra titulada "El acercamiento de la mujer cactus y el hombre globo", que presentará na mostra vilagarciá.
A Concellería de Xuventude, organizadora do evento, decidiu dedicar esta xornada á literatura e música urbanas co obxectivo de captar a atención e o interese da mocidade, un público que gusta destes xéneros qu e enriquecen e amplían o concepto tradicional de literatura.
