Fin de semana para o recordo. Vilagarcía, Cidade de Libro, pechou este domingo unha exitosa edición que destacou pola visita de prestixiosos escritores e escritoras de todo o Estado, deixando "un excelente sabor de boca entre os asistentes e a organización", tal e como destacaron dende o Goberno local. Mostra disto foi a crecente afluencia de público aos actos nos que participaron os autores convidados, aos espectáculos e demais actividades, deixando tamén unha valoración moi positiva entre as librarías locais e editores participantes.
Con estes resultados, a cita afiánzase na axenda cultural do Concello, que seguirá apostando por un evento que abarca a literatura de forma transversal para xerar un recurso que, "ademais de fomentar a cultura e a educación, serve para dinamizar a economía local e para poñer en valor a marca Vilagarcía". Segundo o Goberno local, os mesmos autores convidados contribúen a potenciala "cos comentarios que fan n as súas redes sociais, o que os converte nos mellores embaixadores da cidade".
Cabe recordar que a terceira edición do evento literario promovido dende a Concellería de Xuventude contou coa presenza de escritores e escritoras da talla de Carmen Posadas, Ian Gibson, Carme Chaparro e Juan Tallón, que compartiron charlas con autores como Manuel Portas, J.R. de la Torre e María Solar. As súas Conversas ao Solpor encheron todos os días o espazo habilitado na Praza da II República, cun público adulto, diferente ao que tamén se dou cita nas xornadas nas que interviron Rayden, Rebeca Stones, Juan Arcones e Andrea Maceiras, autores que lograron captar a atención dos seguidores e lectores xuvenís.
Un dos aspectos no que coincidiron varios dos escritores e escritoras e que valoraron de forma moi positiva foi a posibilidade que o formato do Vilagarcía, Cidade de Libro lles ofrece de poder falar sobre os seus libros, e non só de participar en sinaturas, como acontece na inmensa maioría das feiras literarias. Ademais, tamén consideraron "moi estimulante" poder conversar con outros autores e interactuar co público mediante a quenda de preguntas que se abre ao remate de cada evento.
No que ao apartado de vendas se refire, as catro librarías locais que aceptaron o convite do Concello para dispoñer de caseta na feira amosáronse "satisfeitas" coa actividade que rexistraron a raíz dos actos e actividades organizados no marco da mostra e, especialmente, coa nova disposición na que, ao desenvolver máis actividades na Praza da II República, as casetas tiveron maior afluencia de público e de forma máis constante ao longo de todo o horario de apertura. Por parte da organización destacouse tamén coma unha nota positiva que as librarías e as editoriais participasen na creación de contidos, organizando por conta propia algunha presentación de libros e firma por parte de autores relacionados coas temáticas do día, e mesmo actividades lúdicas e concursos, como o torneo TCK de Pokémon.
Dende a Concellería de Xuventude quixeron destacar tamén a gran acollida de público que tiveron as actividades infantís. O Literatour supuxo que un cento de escolares dos centros educativos de Vilagarcía pasasen cada mañá pola feira para participar nas xincanas literarias que tiñan como obxectivo fomentar o hábito da lectura e o gusto pola literatura mediante actividades lúdicas. Con este mesmo obxectivo e tamén con moita participación contaron os espectáculos, xogos e presentacións orientadas ao público familiar e que se desenvolveron en horario de tarde no Parque Miguel Hernández.
