O Pazo Emilia Pardo Bazán acollerá un curso para achegar a dixitalización a aquelas mulleres en situación de desemprego que teñan interese por familiarizarse coas novas tecnoloxías. O programa, que se desenvolverá entre os días 16 de abril e 24 de maio, é totalmente gratuíto para as usuarias, e ten como obxectivo que as asistentes amplíen ou adquiran coñecementos sobre as novas tecnoloxías, tanto no que respecta ao día a día como no eido dos traballos e os negocios, para mellorar a empregabilidade.
O programa está promovido pola Xunta de Galicia a través da Consellería de Promoción do Emprego e Igualdade e financiado a través dos fondos Next Generation EU e o Plan de Recuperación, Transformación e Resiliencia da Unión Europea, e está dirixido únicamente a mulleres en situación de desemprego ou que teñan solicitada a mellora de emprego. Poderán inscribirse aquelas que residan tanto na provincia de Pontevedra, como na de Lugo ou Ourense, e todas as participantes que rematen os tres módulos formativos do programa levarán de agasallo un ordenador portátil.
A inscrición realizarase a través do formulario ao que se pode acceder a través do código QR dispoñible na cartelería que anuncia o programa, pero tamén se pon a disposición o teléfono 604 039 575, ao que se pode chamar ou escribir vía Whatsapp para solicitar información e rexistrar a matrícula. De xeito previo ao comezo das clases, ademais, celebrarase unha reunión na aula formativa do Pazo Emilia Pardo Bazán.
Unha vez iniciado o programa, impartiranse tres bloques. O primeiro deles, sobre competencias dixitais básicas, abordará os coñecementos para o día a día, mentres que o segundo, máis avanzado, orientarase ao eido laboral. O terceiro e último, dirixido ao emprendemento, achegará coñecementos para os negocios. As clases serán de 9.00 a 14.00 horas.
O Concello de Sanxenxo, colaborador da iniciativa, persegue promover a "mellora da empregabilidade das mulleres da nosa contorna, así como o acceso ás novas tecnoloxías de forma sinxela e mediante unha formación guiada e moi práctica".