A Estación Experimental de Viticultura e Enoloxía de Ribadumia acollerá, do 14 ao 29 de novembro, unha nova edición do curso sobre elaboración de viños e produtos derivados. A iniciativa parte da Axencia Galega da Calidade Alimentaria, dependente da Consellería do Medio Rural da Xunta de Galicia e levarase a cabo en horario de 17.00 a 21.00 horas, cunha duración total de 40 horas.
O principal obxectivo deste obradoiro será ensinar aos alumnos o marco legal que regula tanto o sector vitivinícola, como as denominacións de orixe e as indicacións xeográficas protexidas de Galicia. As persoas participantes aprenderán ademais os diferentes procesos e técnicas de elaboracións dos viños e as elaboracións especiais. Tamén abordaranse temas como os puntos de control críticos na elaboración de viños, a maquinaria e equipos a empregar ou os procesos de elaboración das augardentes e licores tradicionais de Galicia, entre outros.
Esta formación está dirixida á xuventude do medio rural galego, así como ás persoas vinculadas profesionalmente, ou con expectativa de incorporación, aos sectores produtivos gandeiros, agrarios, agroalimentarios e de cadea forestal-madeira.
As persoas interesadas en participar nesta acción formativa poderán consultar máis información e realizar a súa pre-inscrición en liña aquí. O coordinador do proxecto porase en contacto coas persoas interesadas a través do correo electrónico comunicándolles se están ou non admitidas. Para consultar calquera dúbida, pode chamarse ao teléfono 886 159 413, ou enviarse un correo a [email protected].
