O Concello de Vilagarcía abriu este venres o plazo de inscrición para a XIX edición da carreira nocturna que se celebrará o sábado 29 de xullo. O evento organizado pola Fundación Municipal de Deportes reúne na cidade a corredores de diferentes partes de Galicia e incluso de Portugal. Os interesados en participar poden anotarse na web www.championchipnorte.com ata as 23.59 horas do 27 de xullo.
A proba contará con diferentes categorías para todos os públicos e os corredores sub 16 poderán participar de balde. No caso da categoría absoluta, os participantes deberán abonar unha cota que ascende a cinco euros, aos que se poderá sumar un euro se desexan alugar o chip de control. A participación nesta categoría limítase ás 350 primeiras inscricións.
A Carreira Nocturna Concello de Vilagarcía é unha proba incluída no calendario oficial da Federación Galega de Atletismo e estará controlada polo Comité de Xuíces do mesmo organismo. As probas absolutas comezarán as 22.30 horas, mentres que as demais terán o seu inicio dende as 21.00 horas.
A carreira desenvolverase a través de 13 categorías e cinco distancias. Os corredores máis novos, os sub 6, correrán 100 metros e os sub 8 e sub 10, 500. Un quilómetro terán que cubrir os participantes nas categorías sub 12 e sub 14, lonxitude que ascende ata os 1.800 metros para os sub 16.
Os corredores que se inscriban na proba absoluta (sub 18, sub 20, sub 23, sénior, máster A, B e C) terán que realizar un percorrido de 10 quilómetros polo circuíto disposto con inicio e final na avenida da Mariña. Nesta ubicación entregaranse os diferentes trofeos, recoñecementos e medallas.