O alcalde de Vilagarcía, Alberto Varela, e membros do equipo de goberno local acudirán este martes ao colexio Rosalía de Castro para participar no acto convocado pola comunidade escolar para protestar polo negativa da Consellería de Educación a dotar ao centro do profesorado necesario para cubrir as necesidades do centro. Coa súa presenza, o executivo socialista volve a poñer de manifesto o seu apoio incondicional a esta reivindicación en concreto, así como o resto de demandas desatendidas por parte do organismo autonómico, tanto no colexio como no instituto O Carril.
O goberno de Varela volve a advertir que a situación na que Educación mantén ao colexio Rosalía de Castro non só impide que o alumnado reciba unha educación de calidade, se non tamén a debida atención que precisan os nenos e nenas máis vulnerables, como son os de menor idade e entre os que hai cativos con necesidades especiais, "e isto non se pode tolerar".
O executivo socialista volve a denunciar "o absoluto deixamento de funcións da Consellería coas necesidades dos centros educativos do municipio", cualificando de "indignante a longa lista de necesidades e peticións que a administración autonómica se nega a atender de forma reiterada pese a tratarse de materias da súa competencia". Á falta de mestres para cubrir o desdobramento da aula de 6º de Infantil súmanse outras como o cambio ventás no mesmo colexio, así como a substitución da instalación de fontanería do IES O Carril, o arranxo integral do parqué do pavillón, a instalación dun ascensor para garantir a accesibilidade, o arranxo da fachada, a dotación dun salón de actos e a solución para o deficitario transporte.
Dende Ravella advírten á Xunta que continuarán esixindo que atendan as súas responsabilidades e que o fagan "non con anuncios preelectorais que logo volven quedar sobre o papel, se nón con solucións inmediatas e efectivas".
