Ravella acaba de adxudicar á empresa Miguel Ángel Rey, SL as obras de ampliación do cemiterio xeral de Rubiáns, por importe de 48.400 euros. Con esta decisión, o executivo local dá resposta a unha demanda veciñal e a unha evidencia que veñen detectando os propios operarios do camposanto: a falla de nichos para satisfacer a demanda, especialmente cando se trata das familias de falecidos que non teñen nichos en propiedade ou en concesión, onde si hai espazo.
A nova ampliación será xestionada directamente polo Concello, a xeito de reserva precisamente para eses casos. En total, construiranse 18 columnas de 4 nichos cada unha, é dicir, 72 novos enterramentos conformando un bloque que continuará a trama reticular dos xa existentes na actualidade.
De acordo co proxecto elaborado polo arquitecto municipal e promovido polo concelleiro de Obras e Relacións Veciñais, Lino Mouriño, as obras de construción do novo bloque inclúen tamén a demolición do recinto cinceiro existente ao fondo do camposanto para a liberación do espazo e, por suposto, a creación dunha cimentación sobre a que se levantarán os módulos dos enterramentos. As obras serán financiadas co préstamo que incluía o Presuposto Xeral para executar o plan de investimentos de 2022.
Paralelamente, o Concello xestiona outro proxecto de mellora global do recinto. Redactado polo estudo Arquitectura Obradoiro Aberto SLP prevé varias actuacións, sendo as principais as relativas á mellora da accesibilidade, aínda que tamén está prevista a renovación do sistema de drenaxe e da iluminación, e un estudo preliminar do estado da capela. As obras contan xa con visto bo de Patrimonio –o camposanto é un ben protexido- e a financiación principal da Deputación a través do Plan Concellos, que se complementa cunha achega propia do Concello de arredor de 30.000 euros.
