Tras unha primeira xornada protagonizada pola posta en valor da tradición e cultura mariñeiras e a gastronomía local, Portonovo vive hoxe un peche por todo o alto da cuarta edición da Festa da Empanada Mariñeira. A fin de semana chegará ao seu fin coa celebración do concurso de empanadas, unha das actividades máis esperadas do evento.
O recinto festivo, habilitado na lonxa de Portonovo, iniciou a súa actividade coa apertura dos stands e a inauguración de tres exposicións: unha de fotografía mariñeira a cargo da Asociación Ollares de Portonovo, outra de maquetas de barcos e tamén unha pequena guía de embarcacións tradicionais de Culturmar.
Na primeira xornada tamén se levou ao cabo un showcooking sobre A Empanada na Dieta Atlántica, con merluza do Pincho de Celeiro, a cargo de Alfonso Díaz, e outro sobre a empanada mariñeira con selo de PescadeRías, con Mari Carmen Sánchez de Galuriña. Unha vez rematados ambos eventos os asistentes puideron gozar dunha actuación musical a cargo de Raúl & Cía.
A oferta gastronómica incluiu singulares recetas de proximidade, como foi o caso das empanadas de algas de Cangas, de anguía de Arcade, de berberechos de Carril, de bonito de Burela, ou de choco de Redondela. O produto autóctono coma o congrio, a raia, a xarda e o peixe porco de Portonovo tamén ocuparon un papel protagonista, cun prezo que oscila entre os tres e os cinco euros por ración.
Para hoxe, a apertura dos stands terá lugar ás 12.00 horas. Nesta segunda xornada, ao mediodía realizarase unha demostración da maridaxe entre a empanada mariñeira e os viños galegos seguida dunha actuación musical. Pola tarde, a partir das 17.00 horas, celebrarase o Obradoiro-Concurso familiar Pequeempanada, a cargo de Rocío Garrido, e dirixido a nenos e nenas de 5 a 12 anos, que deberán estar acompañados dun adulto.
A partir das 18.00 horas celebrarase o IV Concurso da Empanada Mariñeira, co obxectivo de poñer en valor o produto gastronómico PescadeRías, con inscrición gratuita e premios para os tres primeiros clasificados. Ás 19.30 horas terá lugar a Xuntanza da Canción Mariñeira e ás 21.30 horas pecharán as instalacións, despedindo ata o ano que vén a cuarta edición do evento.
