Este luns, o Concello de Ribadumia inaugurou o prazo de inscrición das actividades municipais que se ofrecen para nenos/as e adultos. Toda a oferta de actividades dará comezo no mes de novembro, sempre e cando se forme un grupo mínimo de asistentes. O número de prazas é limitado e a adxudicación estase a facer segundo orde de entrada.
Por isto, desde as 8:00 horas de onte, o Concello de Ribadumia encheuse de persoas interesadas en anotarse nestas actividades, rexistrándose, en moitos casos unha inscrición cada dous minutos. En total, xa hai rexistradas preto dun centenar de solicitudes.
As grandes colas rexistradas dende primeira hora da mañá tamén fixeron que algúns grupos pechasen a súas cotas de inscricións, como é o caso das actividades de pilates, que completou as prazas dos mércores e venres de 9:30 a 10:30 horas no Centro Social de Barrantes, e o grupo dos martes e xoves de 20:15 a 21:15 horas no Ximnasio Novo de Barrantes. Outras actividades moi demandadas durante este luns foron as de patinaxe, ximnasia e mantemento, manualidades e zumba.
Dentro desta oferta destacan os deportes, os idiomas, manualidades, instrumentos musicais e bailes. Todas estas poden consultarse nos dípticos informativos dispoñibles no edificio do Concello que tamén foron enviados aos domicilios de todos os veciños e veciñas do municipio e compartidos nas redes sociais municipais.
O Concello valora moi positivamente a gran acollida que tivo a oferta de actividades e a alta demanda de prazas neste primeiro día de prazo. Por iso, anima a todos os veciños/as de Ribadumia e arredores a inscribirse e participar nas actividades municipais, co obxectivo de fomentar o entretemento e a actividade física como principais impulsores do mantemento da saúde física e mental das persoas.
