Máis de 300 persoas maiores de 50 anos de 30 concellos da provincia gozarán entre este domingo día 19 e o 24 de novembro do programa Depotermal da Deputación de Pontevedra, con estadías no Hotel Carlos I Silgar en Sanxenxo, no Gran Talaso Hotel Sanxenxo, no Hotel Spa Norat Torre Do Deza en Lalín e nas Termas de Cuntis, sendo o último o fixado para a estadía diúrna. Durante a súa estancia poderán desfrutar de actividades de animación sociocultural e de tratamentos gratuítos como sesións monitorizadas de activación muscular e articular, tratamentos dixestivos con augas medicinais, piscina terapéutica, actividades para mellorar a mobilidade e a circulación, combater a dor e a inflamación e reducir o estrés, entre outros moitos.
Deste xeito, este domingo comezan as estadías con pernoita de tres grupos, que estarán aloxados nos establecementos hoteleiros ata o venres 17 de novembro. A primeira destas expedicións, que conta con 90 persoas inscritas dos concellos da Cañiza, A Lama, Baiona, Cangas, Cerdedo-Cotobade, Covelo, Crecente, Gondomar, Nigrán, Poio, Pontevedra, O Porriño, Redondela, Salceda de Caselas, Salvaterra de Miño, Tomiño e Vigo partirá rumbo ao Hotel Carlos I de Silgar, en Sanxenxo. O segundo grupo, que irá ao Gran Talaso Hotel Sanxenxo, está composto por 57 persoas de Cambados, Cerdedo-Cotobade, Gondomar, Moraña, Nigrán, O Porriño, Tui e Vigo. Por último, 43 persoas dos concellos de Cangas, Catoira, Marín, Meaño, Moaña, Nigrán, O Grove, O Porriño, Pontevedra, Sanxenxo, Vigo e Vilagarcía de Arousa desfrutarán dunha estadía no Hotel Spa Norat Torre Do Deza en Lalín.
