Os primeiros cincocentos usuarios do Vaibike! poderán recoller o seu chaleco reflectante a partir deste luns, 17 de abril, no primeiro andar do edificio vello do Concello, en horario de 9:00 a 13:00 horas. O usuario número 500 fixo a súa inscrición o pasado luns, día 10, ás 13:03 horas. Aí é onde se estableceu o corte. O único requisito para recoller o seu chaleco é amosar o seu DNI ou documento equivalente que permita acreditar a súa identidade e comprobar si figura no listado xerado automaticamente pola plataforma de xestión do Vaibike!. É dicir: os afortunadas son as primeiras cincocentas persoas que se inscribiron entre as 00:00 horas do pasado día 1 e as 13:03 do día 10. Na actualidade, os inscritos están próximos ao millar.
O Concello celebra a boa acollida que está recibindo a nova posta en marcha do sistema público de préstamo de bicicletas, ampliado a 16 estacións e 80 bicicletas, entre elas varias con cadeira para bebés e handbikes para persoas con mobilidade reducida. Nestes días, a empresa adxudicataria do servizo estivo arranxando os problemas de enganche nalgunhas estacións e, en xeral, avaliando todo o servizo nos primeiros días de funcionamento. O Concello agradece, por iso, a boa colaboración e comprensión dos usuarios no arranque do Vaibike! que, como todo servizo desta complexidade, necesita dalgunhas xornadas para axustar todas as pezas: estacións, bicicletas, tempos de uso, plataforma de pago...
Como se sabe, nestes momentos e como iniciativa de lanzamento para que o público se familiarice co sistema, que unicamente funciona cunha App móbil, só está dispoñible unha tarifa denominada 'Volvemos!', na que por un so euro e posible dispoñer dunha bicicleta durante tres meses, do 1 de abril ao 30 de xuño. A partir desta data, os usuarios poderán escoller entre recibir en préstamo unha bicicleta por día (5 euros), semana (12), mes (20) ou ano (36). Para esa segunda fase, o Concello xa ten previstas outras accións de promoción dunha iniciativa que conta co financiamento de fondos europeos a través da Edusi 'Vilagarcía Avanza'.
