O acceso ao centro de Vilagarcía dende Rodrigo de Mendoza e a circulación rodada no casco urbano veranse interrompidos este mércores a mediodía polo paso dunha manifestación. A marcha sairá ás 12.00 horas da rotonda de Larsa para dirixirse pola avenida das Carolinas a Rodrigo de Mendoza e xirar na glorieta da Mariña Española cara Doutor Tourón. Os manifestantes continuarán por Alejandro Cerecedo e introduciranse pola rúa peonil de Arcebispo Lago para concluír cunha concentración na Praza de Galicia.
A Policía Local informa de que a manifestación ten previsto ocupar os dous carrís da circulación, polo que o paso de vehículos quedará totalmente cortado por onde vaia pasando o acto de protesta.
A garda municipal aconsella aos condutores de paso que utilicen as vías de circunvalación. Para dirixirse ao centro da cidade dende a avenida de Cambados recomendan desviarse pola N640 ou pola rúa Pablo Picasso en dirección á rúa Valle Inclán. No caso dos vehículos procedentes de Carril en dirección á avenida de Pontevedra, a alternativa é coller pola rúa Rivero de Aguilar en dirección a Valle Inclán.
