Castes, a feira independente do viño que organiza o Wine&Beer Bar Derby, coa colaboración do Concello, arranca este mércores, día 23, coa selección dos viños que serán premiados o vindeiro domingo, pero tamén cun acto aberto ao público: un curso de iniciación á cata que ten carácter gratuíto, da man da Asociación Galega de Sumilleres.
O encontro será impartido por Juanjo Figueroa, un dos máis recoñecidos profesionais do sector, presidente da Asociación, copropietario do restaurante Lume de Carozo e xefe de estudos do Instituto Galego do Viño.
O curso, que conta cun total de 20 prazas dispoñibles, desenvolverase no primeiro andar da praza de abastos a partir das 20:00 horas. Os interesados en participar poden inscribirse enviando un correo electrónico á dirección [email protected] ou ben chamando ao teléfono 630 72 22 26.
O groso da feira concentrarase o vindeiro fin de semana, no que haberá túneles do viño e unha feira propiamente dita, na que ata 60 bodegas darán a coñecer as súas elaboracións. A Champaña francesa terá este ano especial protagonismo, compartindo espazo con bodegas de España e Portugal. Castes tamén será sede dun concurso internacional de cata.
