A Policia Científica investiga a orixe do incendio rexistrado onte no interior do Balneario da Praia de Compostela. Malia non terse producido danos materiais de importancia, nin persoais, a aparición de dous focos ao mesmo tempo e situados en diferentes lugares do edificio propiciou a apertura de dilixencias para determinar as causas do incidente.
O lume extinguiuse en poucos minutos e non causou ningún dano na estrutura do inmoble municipal. Os únicos estragos producíronse en desperdicios e os obxectos persoais dos indixentes que nalgún momento usaron as instalacións para pasar a noite.
O incendio produciuse pasadas as doce do mediodía. Ata o lugar desprazáronse efectivos do Servizo Municipal de Emerxencias que se encargaron de controlar e apagar o lume, tarefa que levou apenas 15 minutos. Un dos factores que favoreceu a escasa incidencia do lume foi que o Concello xa procedera hai anos a baleirar o edificio de mobiliario e todo tipo de aveños. Cando chegou o persoal desprazado do Parque Comarcal de Bombeiros de Ribadumia, o incendio xa estaba totalmente controlado, quedando pendentes unicamente as labores de arrefriado das instalacións que se realizaron a continuación.
Froito do despregue dos vehículos de extinción de incendios e tamén do fume que emanaba cara a rúa, a Policía Local cortou totalmente o tráfico na avenida Rosalía de Castro durante uns cinco minutos, procedendo a habilitar un carril tan pronto como se disipou o fume e restablecendo totalmente a circulación sobre as 12.20 horas.
Ata o Balneario desprazáronse a tenente de alcalde e concelleira de Servizos Sociais, Tania García, e o edil de Turismo, Álvaro Carou, para comprobar o alcance do incidente e adoptar as medidas pertinentes. En primeiro lugar, os Servizos Sociais municipais puxeron en marcha o protocolo de actuación coas entidades sociais do municipio para pescudar si actualmente había persoas que durmían no balneario e, de ser así, localizalas e ofrecerlles acollemento. A continuación, tras comprobarse que o edificio non tivera sufrido danos estruturais, deuse orde de volver a tapiar portas e ventás para evitar o acceso de okupas.
