Hostelería do Salnés muda de escenario despois de tres anos no Real Club Náutico de Sanxenxo. O obradoiro de emprego impulsado pola Mancomunidade do Salnés vén de acadar a súa XIV edición celebrando a estrea dunha nova sede no municipio (rúa Ourense, 24), cun total de 20 alumnos e alumnas que foron seleccionados para cursar as especialidades de Cociña e de Restaurante-Bar durante 12 meses, en grupos de 10 cada unha.
As novas instalacións destinadas á actividade, que está subvencionada pola Consellería de Promoción de Emprego e Igualdade, conta cunha superficie de 296 metros cadrados, entre unha cociña industrial completamente equipada, comedor e aseos. A Mancomunidade do Salnés dispón do local para esta fin en réxime de aluguer por un ano prorrogable, e acometeu obras de adecuación para a instalación de material e renovación da súa estética, cun investimento duns 40.000 euros. Neste sentido, tal e como sinalou este venres o xerente, Ramón García Guinarte, durante a xornada inaugural, a adecuación levouse a cabo "en un tiempo récord, pero en el que se consiguieron cumplir los plazos".
O delegado territorial da Xunta de Galicia en Pontevedra, Luis López, a xefa territorial de Pontevedra da Consellería de Promoción de Emprego e Igualdade, Marta Mariño, o alcalde de Sanxenxo, Telmo Martín e a presidenta da Mancomunidade do Salnés, Marta Giráldez, acompañada do xerente da entidade, foron os encargados de dar a benvida ao curso, nun acto no que Giráldez quixo destacar a boa marcha da iniciativa, que conta "cun índice de inserción laboral de case o 100%, se non do 100%", asegurou.
Deste xeito, Giráldez louvou a "selección excepcional" que se levou a cabo no que respecta ao alumnado participante, e dirixiuse a el para trasladarlle que a calidade profesional dos futuros traballadores da hostelería é "a nosa bandeira. Galicia é un referente no turismo, pero o Salnés é referente do norte de España e de Galicia con diferencia", afirmou.
Pola súa banda, o delegado territorial da Xunta, Luis López, parabenizou aos seleccionados e seleccionadas e destacou "o aporte de medio millón de euros" por parte da Xunta de Galicia "en base a un proxecto" coma este.
López tamén valorou positivamente o percorrido do obradoiro no que "levamos formadas a case 300 persoas" e pediu ao alumnado que complete a totalidade da formación pese ás temperás ofertas laborais que cheguen nos vindeiros meses.
No que respecta á calidade das instalacións, tanto o delegado da Xunta coma o alcalde, Telmo Martín, coincidiron en enxalzar o seu "excelente nivel".
COMPETENCIAS. Durante a xornada inaugural de Hostelería do Salnés, á que tamén asistiron representantes dos distintos concellos que forman a Mancomunidade, do comercio local de Sanxenxo e de Cáritas, o alumnado fixo unha demostración dos coñecementos adquiridos dende o inicio do curso, o pasado mes de outubro, cun cátering composto de croquetas, empanada, canapés, patacas con raiadura de cítricos, queixos e postre, cunha coidada presentación.
A maiores da formación teórica e práctica, o alumnado tamén prestará servizos por toda a comarca coma a promoción do turismo gastronómico, colaboración co comedor de Cáritas en Vilagarcía, elaboración de guías Xacobeo e showcookings.
