O presidente do Partido Popular de Pontevedra, Luis López, sinalou hoxe que “O Grove necesita e debe espertar do seu letargo. Non pode seguir perdendo oportunidades”, e recordou que ten todo o potencial para ser un concello referente en moitos eidos: a nivel turístico, medioambiental, gastronómico, co sector do mar, a nivel cultural e deportivo... e por iso “non pode seguir esperando a ver que é o que pasa, porque as oportunidades hai que traballalas, hai que buscalas, hai que conseguilas”.
Neste senso presentou ao Partido Popular de Pablo Leiva como “unha verdadeira alternativa de Goberno”, porque presenta ante os veciños “un proxecto serio, estable e moi necesario para O Grove, afastado dos populismos, dos egos e dos personalismos”.
Foi durante a presentación de Leiva como candidato á alcaldía do Grove e do resto da candidatura, na que tamén participaron a vicepresidenta segunda do Congreso, Ana Pastor, e o responsable de Cultura e Educación do Goberno galego, Román Rodríguez. O líder provincial destacou que “Pablo é unha persoa con inquedanzas, formada e preparada. Teno todo para ser un magnífico alcalde. E asume un compromiso importante con todos os seus veciños porque está convencido de que aquí hai moitas cousas que facer para recuperar o esplendor que tivo O Grove hai non tantos anos, e que pouco a pouco se foi perdendo a costa da inacción deste Goberno, un Goberno esgotado, que xestiona mal e por inercia e, o peor de todo, de costas aos veciños, aos colectivos…”. Un alcalde que, engadiu, “está máis cómodo en confrontar que en xestionar o seu concello”.
Por iso, dixo que “no Grove hai unha maioría real, palpable e clamorosa que espera pola alternativa, e por iso hai que dicirlles que o PP é esa maioría e esa alternativa. Somos o único partido que pode garantir o cambio real”.
Pola súa parte, Pablo Leiva puxo en valor que “a política local é a política da proximidade, do contacto directo coa cidadanía, da escoita activa… E durante os últimos anos os veciños do Grove non foron escoitados nin as súas demandas atendidas”. Por iso, pediu apoio para garantir un cambio de rumbo, porque estas son as eleccións máis importantes para os concellos. “A política local é a que transforma o concello no que vivimos e en doce anos de Goberno socialista, oito de forma consecutiva, non se lograron cubrir os servizos máis importantes. Esquecéronse das persoas, fixeron promesas que incumpriron por sistema e un dos documentos máis importantes para o desenvolvemento e crecemento deste concello segue escondido nun caixón”.
O candidato popular adiantou que dentro do seu programa de Goberno incluiranse políticas centradas nas persoas, a prestar máis atención aos maiores e pensar na mocidade como proxecto de futuro. Entre outras medidas, que presentarán máis adiante, tamén apostarán por iniciativas encamiñadas a favorecer a conciliación laboral e familiar, así pois ademais de promover a construción dun Centro de Día e de ampliar o servizo de axuda no fogar, tamén proxectarán a ampliación da Escola Infantil 0-3 anos.
Por último, con respecto á candidatura, adiantou que se renova nun 75%, que combina experiencia con xente que accede por primeira vez á política, e que o fai con moitas ganas, ilusión e ideas renovadas. “Presentamos unha candidatura moi potente, preparada e comprometida, para devolver a ilusión aos nosos veciños e recuperar o lugar que O Grove merece”.
