O consello reitor da Fundación de Deportes aprobou na súa última reunión, o pasado luns, o reparto das subvencións aos distintos clubs e entidades da cidade que concorreron á convocatoria deste ano, relativa á actividade federada de 2021. En total, son 94.175 euros, que se repartirán entre 22 clubs. Catro quedaron fóra por incumprir diversos aspectos das normas.
O Arousa SC encabeza ese reparto, con 10.654 euros, seguido de preto pola Asociación Deportiva Cortegada (9.204 euros), Basket Base Club, con 8.025, e Club Xadrez Fontecarmoa (6.801). A partir hai un grupo de entidades que recibirán 3.000 e 6.000 euros: Atlética Mazí, San Martín, CB Vilagarcía, Salvamento Vilagarcía, Club de Natación, Vilarousa Gimnasia, Os Ingleses, Escola Deportiva de Arousa, Club Balonmano Arousa e Club Atlético Arousana. Entre os 272 euros do Club Ciclista Xiabre, o que menos recibirá, e os 2.221 do Club de Piragüismo, sitúase outro grupo no que figuran o club polideportivo do Colexio de Educación Especial, o Club Pérez-Sub, a Asociación Deportiva Arousa F7, a asociación de Esgrima e o club de Ximnasia Rítmica.
Catro clubs quedaron fóra do reparto de axudas por non cumprir coas normas da convocatoria: Motoclub VFM, Club de Remo Vilaxoán, Club Olimpic Vilagarcía e Cl ub Vilagarcía Tenis de Mesa.
Tanto o reparto das subvencións como a denegación de axudas a esas catro entidades foron aprobadas por ampla maioría, con unha única abstención e ningún voto en contra. A partir da notificación do acordo, os clubs e entidades beneficiadas terán un prazo determinado para presentar as facturas e os comprobantes de pago por importe suficiente para xustificar como mínimo unha cantidade igual ao montante da subvención. Para iso, a Fundación ten contratada, e posta a disposición dos clubs, unha plataforma de axuda no trámite.
