A empresa Galsur Proyectos y Obras vén de dar por finalizado o acondicionamento da Praza Doutor Carús e da praciña situada tras o centro social do Ramal, obra contratada polo Concello para arranxar o deteriorado pavimento destas dúas bolsas de estacionamento gratuíto. Cun investimento de 48.000 euros, os traballos permitiron mellorar o firme e as condicións de tránsito, tanto dos vehículos como dos peóns que fan uso ou circulan por estas zonas, elevando así a seguridade viaria e evitando as molestias que se producían anteriormente debido ás fochas e desniveis do terreo que existían en ámbolas dúas prazas.
Os traballos realizados foron diferentes en cada espazo, atendendo ás características dos mesmos. Como a praciña do Ramal tiña pavimento de terra, a actuación consistiu no nivelado do terreo e posterior estendido dunha base de xabre. Para evitar a acumulación de auga na superficie e a creación dos molestas pozas, instalouse unha canalización para a recollida de pluviais cos correspondentes sumidoiros e arquetas. Finalmente procedeuse a pavimentar a superficie con aglomerado.
No caso da céntrica Praza Doutor Carús, o pavimento xa era de asfalto polo que o procedemento foi distinto. En primeiro lugar levouse a cabo un varrido de todo o firme para retirar as distintas capas de material existentes e deterioradas, nivelar o terreo e preparalo para a pavimentación final. A continuación eleváronse as tapas de rexistro de todos os servizos e, por último, procedeuse ao repitando das prazas de estacionamento e das liñas da sinalización viaria, vaos e pasos de cebra.
