O PSdeG-PSOE de Sanxenxo prevé aprobar a súa nova executiva local o vindeiro mes de decembro, configurada co obxectivo de "converterse nunha imaxe fiel da pluralidade social que existe no concello", segundo explicaron dende o partido. Trátase dun paso adiante do grupo que abre así unha nova etapa, coa nova Xunta Xestora xa constituída durante a xornada deste martes, con Fernando Otero á fronte.
Completan o equipo Rebeca Fernández, Marta Caneda, Ángeles Agís e Fernando González e, ademais, conta coa presencia da vicesecretaria xeral provincial, Paula Fernández, e do vicesecretario provincial de Acción Electoral, Manel Vázquez, como representantes da Comisión Executiva Provincial. Dende o grupo quixeron salientar tamén que "a composición deste órgano provisional é paritaria, de acordo cos estatutos do PSOE".
O próximo paso, unha vez constituída a Xunta Xestora provisional, é a convocatoria da militancia de Sanxenxo, chamada a unha asemblea xeral en decembro da que sairá a nova Executiva, que trazará o rumbo do partido ata as vindeiras eleccións municipais, coa intención de "presentar unha candidatura sólida e forte, que retome non só a tradición socialista deste concello, senón que encaixe perfectamente coas demandas da sociedade", manifestaron dende o partido.
O propósito da Xestora que guiará o proceso ata o próximo mes é sentar as bases para chegar á asemblea constitutiva "cunha lista unitaria que sexa, ademais, a pedra angular do futuro proxecto socialista nas eleccións municipais de dentro de catro anos, un proxecto de progreso por e para a xente", manifestou Fernando Otero.