O alcalde, Alberto Varela, e o concelleiro de Seguridade Cidadá, José María González, recibiron esta mañá ao xefe da Comisaría Provincial de Pontevedra, Juan José Díaz Jiménez, na que foi a súa primeira visita institucional á cidade dende que foi nomeado responsable da Policía Nacional na provincia o pasado mes de xullo. Na reunión analizouse a situación do municipio en canto a seguridade cidadá en base ás estatísticas de criminalidade elaboradas polo Ministerio, que seguen demostrando que Vilagarcía é unha cidade tranquila e segura, segundo concluíron o comisario provincial e os munícipes.
Pese a tratarse dunha reunión de carácter institucional, o encontro desenvolveuse de xeito distendido xa que tanto o alcalde como o concelleiro xa coñecían persoalmente a Díaz Jiménez do seu paso pola Comisaría de Vilagarcía, ao fronte da cal permaneceu durante uns meses hai uns anos. Precisamente, este coñecemento directo e a fondo da realidade do municipio en materia de seguridade cidadá e do tipo de incidencias que aquí se rexistran danlle aínda máis peso ás afirmacións de que Vilagarcía é unha cidade segura en xeral e, especialmente, si se comparan as estatísticas de conflitividade ou criminalidade con outros municipios galegos e incluso nacionais.
