A empresa Moncosa OHS dá estes días os últimos retoques á obra de mellora de servizos e da accesibilidade levada a cabo polo Concello na praciña situada ao inicio da rúa Fontecarmoa. Cun investimento de 10.400 euros, a administración local promoveu os traballos que permitiron resolver as carencias e os problemas existentes nas redes de recollidas de augas pluviais e residuais, así como a acondicionar o terreo para facilitar o acceso ás vivendas e garaxes situados no emprazamento.
A obra que está a piques de rematar supón mellorar considerablemente as condicións nas que se atopaba a praciña, cuxa principal característica é a súa accidentada topografía, o que complicaba a accesibilidade. A parcela na que se asenta a praza suma 116 metros cadrados e ten forma triangular cunha forte pendente. Para resolver esta problemática nivelouse parte do terreo e, para salvar a diferenza de cota, habilitáronse varios tramos de ramplas ou beirarrúas a modo de terraza que, cumprindo a normativa de accesibilidade, facilitan o acceso a todas as vivendas. A pavimentación realizouse con formigón continuo, con acabado cepillado para minimizar o risco de escorregamentos.
No que aos servizos se refire, instalouse unha nova tubaxe que se conectou ao colector de saneamento da rúa, de xeito que se garante a axeitada evacuación das augas residuais. Tamén se colocou un canlón sumidoiro para recoller as pluviais das cotas máis baixas e conducilas á rede.
Ademais do comentado, a actuación levada a cabo tamén mellora considerablemente a imaxe desta pequena praza, seguindo a estética dos traballos realizados recentemente nas inmediacións con motivo da glorieta construída na encrucillada que forman as rúas Fontecarmoa e Vista Alegre coa vía principal de Doutor Tourón e avenida de Cambados.
