O Auditorio do Grove acolleu durante os meses de setembro e outubro a residencia da compañía Redrum Teatro. O grupo estivo unha semana de setembro e outra de outubro ensaiando O pequeno poni unha nova obra que estrearán o 13 de outubro.
O pequeno poni é un texto do autor Paco Bezerra, un produto de ficción creado a partir de dúas historias reais de acoso escolar acontecidas en Carolina do Norte no ano 2014, un texto descarnado e real, imprescindible nunha sociedade que necesita profundar máis na loita contra o acoso escolar. A obra aborda o acoso escolar desde a perspectiva do ámbito familiar.
O concello do Grove e a compañía Redrum Teatro convidaron aos centros educativos da zona á pre-estrea desta estremecedora obra, o martes 10 de outubro, co fin de axudar a concienciar á poboación escolar sobre este durísimo tema e seguir achegando a mocidade ao teatro.
Ata o Auditorio achegouse alumnado do IES Monte da Vila, IES As Bizocas do Grove e o IES Faro das Luás de Vilanova acompañado do seu profesorado, máis de 430 mozos e mozas da ESO e Bacharelato.
Ao rematar a representación o elenco da obra mantivo un coloquio con todas as persoas asistentes para debater sobre a representación e o acoso escolar.
