Os puntos móbiles repiten semanalmente un circuíto por catorce lugares do municipio

O servizo dos puntos limpos móbiles posto en marcha hai un mes en Vilagarcía repite semanalmente un circuíto con parada en catorce emprazamentos diferentes do municipio. A ruta inclúe zonas do casco urbano e tamén da periferia co obxecto de facilitar que o conxunto da veciñanza poida contribuír a mellorar a xestión dos residuos de forma cómoda e sen ter que desprazarse ás instalacións de Pinar do Rei. Os contedores itinerantes pasan unha xornada completa en cada unha das escalas, dende as 8 da mañá dun día concreto da semana ás 7 da mañá do seguinte, excepto o sábado que se recollen ás 23.00 horas dese mesmo día.

De luns a sábado

O circuíto comeza os luns pola mañá con paradas na rúa do Porto -para dar servizo á veciñanza de Trabanca Badiña e A Torre- e na Praza de Ravella. Os martes os contedores desprázanse ata a Praza da Liberdade, en Carril, e a avenida Rosalía de Castro (fronte ao restaurante Suso). A rúa Florida, nas Carolinas, e a Praza da Constitución son as paradas establecidas para o mércores, mentres que as do xoves fanse no Piñeiriño (na zona peonil onde conflúen as rúas Camilo José Cela e Álvaro Cunqueiro) e na Praza de España.

Ao día seguinte, o venres, os puntos limpos paran na Praza Rafael Pazos de Vilaxoán e no Campo da Festa de Sobradelo, mentres que o sábado están presentes nas inmediacións da Praza de Abastos de Vilagarcía (entre as rúas Alexandre Bóveda e Arcebispo Lago) e na avenida Rodrigo de Mendoza, na zona do triángulo peonil habilitado a carón do río. Como o domingo no se presta servizo, o circuíto reiníciase cada luns seguindo a mesma orde.

O calendario e as localizacións exactas dos puntos limpos pódense consultar a través do enlace a google maps.

Cartuchos de impresora, cápsulas de café ou pequenos electrodomésticos

Os remolques dos puntos limpos móbiles contan con compartimentos diferenciados e estancos para os catorce tipos diferentes de lixo que se poden depositar neles. Deste xeito garántese a recollida selectiva en orixe dos residuos contaminantes ou cuxos compoñentes son susceptibles de someterse a procesos específicos de reciclado para darlles unha segunda vida ou extraer materias para elaborar outros obxectos.

Os residuos aceptados para desbotar nos puntos limpos móbiles son tóners e cartuchos de impresora, aerosois e envases de pintura, pequenos electrodomésticos, aparellos electrónicos e informáticos, lámpadas e fluorescentes, xoguetes de plásticos duros (non envases), pilas e baterías, roupa e cazado, CDs e DVDs, cápsulas de café, cargadores e auriculares e material de escritura.