Vilagarcía de Arousa dá comezo as festas patronais de San Roque este venres 11 de agosto cunha potente axenda na que, ademais dos actos tradicionais, como pode ser a lectura do pregón e a ofrenda floral ao Santo Patrón, haberá dous potentes espectáculos: a actuación de Leo Bassi no Auditorio no marco do Festaclown e o concerto de Don Patricio na Xunqueira.
O pistoletazo de saída darase as 20.30 horas na Praza de Ravella coa lectura do pregón a mans da xornalista María Foscaldo, máis coñecida en redes sociais como MeryFos. Afincada en Vilagarcía suma máis de 150.000 seguidores en TikTok e Instagram, onde popularizou á personaxe Virtudes de Galiñanes, alias a repunante. A pregoeira declarou que fará un pregón divertido no que igual aparece este personaxe. Como se vén facendo dende o 2019, a lectura traducirase á lingua de signos.
A Banda de Música de Vilagarcía e as agrupacións sociais e culturais reuniránse na Praza de Ravella e, unha vez rematado o pregón, desprazaranse camiñando ata a Praza de España para participar na ofrenda floral ao Santo Patrón. A comitiva desfilará polos Xardíns de Ravella, a Rúa Ramón y Cajal, a Praza de Galicia, as rúas Castelao, Xeneral Pardiñas e Covadonga para rematar ante a igrexa de Santa Baia de Arealonga, onde ás 21.00 horas comezará a homenaxe a San Roque.
A primeira noite das festas de San Roque estrearase cun concerto gratuíto do artista urbano Don Patricio no Parque da Xunqueira, quen se fixo coñecido no 2019 ao sacar a canción Contando Lunares, éxito co que foi nomeado a diversos premios musicais españois e obtendo o galardón de Mellor Artista Urbano 2019.
Festaclown
Por outro lado, Leo Bassi subirase ao escenario do Auditorio as 21.00 horas para inaugurar oficialmente o Festaclown, evento que apadriña co seu novo espectáculo. O irreverente bufón italiano é un home comprometido que considera que o pallaso debe mirar directamente ao poder, mofarse del e denuncialo mediante a risa. Chega a Vilagarcía o seu último traballo, 70, no que a través da súa memoria descobre que hai que volver ao humanismo e aos institntos. Esta é a única actividade do Festaclown para a que haberá que adquirir entrada. Venderanse no Auditorio a partir das 20.00 horas ao prezo de 5 euros. O espectáculo está recomendado para público a partir dos 16 anos.
Cortes de tráfico
Debido á lectura do pregón e a ofrenda floral, este venres pola tarde o tráfico estará cortado na Avenida Juan Carlos I e no acceso á Praza España. O corte será a partir das 20.15 horas. Ademais, os estacionamentos das rúas polas que discorrerá a comitiva deberán quedar despexados por completo a partir das 18.00 horas.
A avenida Juan Carlos I pecharase ao paso de vehículos dende a estación de servizo de San Roque ata a confluencia da avenida Rosalía de Castro coa rúa Colón. En cada punto de corte haberá un axente que autorizará o acceso a garaxes aos vehículos que non precisen chegar ata a Praza de Ravella, sempre que as circunstacians o permitas.
Os usuarios de vaos e os residentes no barrio de Os Duráns deberán dirixirse pola avenida Rosalía de Castro e posteriormente por López Ballesteros. O acceso rodado á Praza de España, onde se atopa a igrexa de Santa Baia de Arealonga, cortarase minutos antes do inicio da ofrenda floral, previsto para as 21.00 horas, dende a intersección da avenida do Doutor Tourón coas rúas Fariña Ferreño e Alejandro Cerecedo. Permanecerá pechado ao tráfico ata o remate da ofrenda.
