Ana Granja propón para Vilagarcía un cambio "aquí e agora"

O presidente do Partido Popular de Pontevedra, Luis López, sinalou este domingo que “Vilagarcía de Arousa quere unha alcaldesa como Ana Granja, coa que recuperar a forza e o potencial que ten esta cidade”. 

Foi durante a presentación da candidatura coa que os populares concorren ás eleccións municipais de maio, presentación na que tamén participou a vicepresidenta segunda do Congreso, Ana Pastor. O presidente popular destacou que “o PP ofrece un proxecto para a maioría social que quere ese cambio. Vilagarcía ten que volver a ser a oitava cidade de Galicia. Ten historia, potencia demográfica e recursos de sobra para recuperar a importancia que tiña e volver a ser motor da comarca do Salnés. E nós imos traballar duro para recuperalo. Tedes o compromiso de Ana e de toda a candidatura do PP, e tamén o meu”.

López agradeceu o traballo feito polos populares nos últimos catro anos en defensa da cidadanía e de Vilagarcía, pero tamén a nivel interno do partido. “Chegamos a esta convocatoria máis unidos que nunca. Esta é unha das grandes fortalezas do noso partido. Porque somos un partido de maiorías, que representamos á maioría dos vilagarcíans. Por iso é fundamental a unión de todo o centro dereita para ofrecer un proxecto sólido, un proxecto á altura do que necesita esta cidade. Unha unión que será fundamental para recuperar a confianza dos veciños no proxecto do Partido Popular”. 

Apuntou que as eleccións do 28 de maio son moi importantes “para decidir sobre o futuro da cidade, pero tamén porque son a primeira oportunidade para cambiar o Goberno de España”. Ademais, recordou que “o alcalde é o candidato de Pedro Sánchez. Cada vez que tivo que elixir, sempre elixiu ao seu partido por riba dos intereses e das necesidades dos seus veciños”.

Pola súa parte, a candidata Ana Granja referíuse á necesidade do cambio durante a súa intervención: “Aquí e agora comeza o cambio que Vilagarcía e os vilagarciáns merecemos e necesitamos”. E agradeceu a toda a candidatura  a súa implicación. “Contamos con 27 homes e mulleres que representan o mellor de Vilagarcía e que están chamados a construír esa cidade mellor que todos queremos”.

Destacou que o seu goberno centrarase en avanzar “con Vilagarcía, da man da cidadanía e non de costas á cidade. Porque iso é precisamente o que sufrimos durante oito anos, cun Goberno que fixo o que quixo, non o que os veciños necesitaban”. Por iso, criticou que se dedicasen a “crear problemas onde non os había, mentres que os problemas reais continúan sen solucións”. 

Granja tamén aposta pola cercanía, “porque é precisamente o que faltou en oito anos dun goberno que non pisou a rúa máis que para ir do concello á súa casa e viceversa”. E farano “contigo, con toda a cidadanía, porque o cambio en Vilagarcía só será posible con todos e cada un dos veciños, vivan onde vivan”.