A Deputación de Pontevedra aprobou en Xunta de Goberno o demandado proxecto de execución da mellora da mobilidade peonil na estrada EP-9401. A obra situarase na Travesía Meis-San Salvador-Enlace Autovía (AG-41). Conta cun orzamento de case 250.000 euros, dos que a Deputación asume o 80% e o Concello de Meis o 20% restante. Resolverá os problemas de seguridade viaria que presenta a estrada para a circulación peonil e dos colectivos máis vulnerables pola actual falta de sendas e beiravías, unha demanda histórica da veciñanza da zona.
A EP-9401 na que se vai actuar enlaza coa EP-9403 e coa Autovía do Salnés, polo que rexistra un importante tránsito que fai necesario garantir a seguridade das e dos peóns, tratándose dunha zona na que hai numerosas vivendas e servizos. Por este motivo, a principal actuación da obra consiste na construción dunha senda peonil de 2,5 metros de ancho mínimo, cómoda e segura, ao longo dos 320 metros da estrada. Será de formigón coloreado e situarase na marxe esquerda, así como no inicio e no final da marxe dereita.
Ademais, o proxecto contempla outras actuacións, como a renovación do pavimento, a mellora da drenaxe lonxitudinal, a instalación das canalizacións e arquetas para o soterramento das redes de baixa tensión e telecomunicacións, e a execución dunha nova rede subterránea de alumeado público. Dado que o ancho da calzada actual é insuficiente, levarase a cabo o ensanche da mesma coa execución do paquete de firme completo de aglomerado naquelas zonas onde sexa necesario.
Por último, executaranse tres pasos de peóns sobreelevados e renovarase a sinalización horizontal e vertical en todo o treito. Ademais, para completar a obra, que ten un prazo de execución de cinco meses, a estrada terá unha velocidade máxima de 30 quilómetros por hora para garantir a seguridade e convivencia de vehículos e persoas.
