Tres voces serán as que reciten os seus poemas na Sala Nauta de Sanxenxo por motivo da exposición do artista do mar, Antón Sobral o próximo xoves 24 de agosto. Carmen Quinteiro, de Pontevedra, mestra de educación infantil e primaria estará disposta a mostrar os seus escritos. Comezou no ano 2008 a escribir, primeiro como desafogo vital e logo por pura satisfacción. Dende o 2009 participa en talleres e obradoiros e no 2010 convértese en alumna da Escuela de Escritores de Madrid en distintos cursos de microrrelato, relato curto e poesía.
A voz do poeta e escritor de relatos de Bueu, Xaime Toxo, tamén estará o xoves na Sala Nauta. Este pedagogo e mestre especialista en Cegueira e BaixaVisión, que forma parte do Equipo de Intervención Pedagóxica en Cegueira, Baixa Visión e Orientación Escolar da O.N.C.E na provincia de Pontevedra, publicou libros na editorial Xerais e en Ancoradouro, ademais de coleccionar distintos premios. Sempre xunto a Antón Sobral, con quen ten ata un libro, Caderno do Mar. Do pintor séntese irmán, co que viaxa "por derrotas sen rumbo".
Por último, o pintor do mar de Marín e de Galicia tamén estará disposto a recitar os seus poemas. Antón Sobral, artista e activista cultural, ten realizado máis de duascentas mostras en todo o mundo e agora chega a Sanxenxo, para ensinar os seus cadros e tamén a súa obra escrita. Pois ten publicados dous libros de poemas: Baila Conmigo Ata o Final do Amor e Na Noite que Treme. Durante nove anos coordinou o festival de poesía máis importante de Galicia, Pontepoetica.