Preto dun milleiro de traballadores do sector do mexillón volveron a concentrarse este sábado fronte á sede da Xunta en San Caetano, en Santiago de Compostela, para reclamar á administración autonómica "recuperar a xestión da mexilla" e pediron tamén a dimisión da conselleira do Mar, Rosa Quintana.
Convocados por unha trintena de asociacións, os 'bateeiros' manifestaron que se atopan ante "un problema serio e urxente", xa que, segundo apuntaron, as industrias "están desabastecidas de mexillón" e durante esta campaña, que aínda non finalizou, atópanse "desesperados, amontoados polas pedras recollendo a mexilla". "Esta non é a solución", proclamaron.
Nesta liña, o presidente da Federación Arousa Norte, Álex Tubío, criticou o "desprezo" do presidente da Xunta, Alfonso Rueda, por seguir "sen querer" recibilos. "Non entendemos por que este desprezo a un sector do que dependen tantas miles de persoas. Non ten moito sentido", reprochou.
En canto ao papel da Consellería do Mar, Tubío asegurou que non saben "nada de nada". "O único", engadiu, a intervención de Rosa Quintana no Parlamento, onde "dixo que estaba a elaborar un novo plan da mexilla". Un plan que, segundo o presidente de federación arousá, "vai en contra" das necesidades do sector e "da explotación axeitada dos recursos" porque, ao seu xuízo, "o único que provoca é desesperación e que aumente o risco".
Por estes motivos, 'Quintana dimisión!' foi a proclama máis repetida este sábado fronte á sede do Goberno galego, nunha concentración na que tamén participaron cargos políticos da zona do Salnés, entre os que se atopaba o alcalde de Vilanova de Arousa, o popular Gonzalo Durán, que volveu mostrar o seu apoio ao sector.
Perdas
Ademais, o sector insistiu na necesidade de derrogar o artigo 13 do regulamento 153/2019 que lles "impide ir a todas as zonas de cría". "Téñennos recortados o 16% da costa, que é onde nós recolliamos a cría. Pódennos dar o outro 80%, pero se non é onde se fixa na roca, non nos serve de nada", expuxo o presidente de Asmecruz, Juan José Piñeiro.
Neste contexto, os 'bateeiros' calculan que o pasado ano tiveron "30 millóns de quilos menos de produción" e, este ano, prevén que "van ser bastantes menos" mentres a colleita de 2024 "está aínda no aire".
"O problema é que se vai a agravar. Este ano agudízase porque a semente nas zonas que nos deixaron aberta non a había. Pero o ano pasado tivemos a sorte de que fomos collendo, pero este ano xa se agudizou moitísimo máis", expresou Piñeiro.
Sobre isto, Álex Tubío sinalou que a solución non pasa por "porlle unha vela a algún santo" para esperar a que apareza a cría. "Non podemos depender da sorte", defendeu, antes de insistir en que é necesario que volvan ter as zonas que tiveron "sempre".
Sen incidentes
A concentración, que comezou sobre as 10.30 horas do pasado sábado, levouse a cabo sen incidentes, despois de que o pasado mes de abril unha das protestas dos mexilloeiros, tamén nas inmediacións do complexo administrativo da Xunta, finalizase cunha carga policial e dúas persoas detidas.
Uns incidentes que Tubío cualificou este sábado de "lamentables" e sobre os que segue sen entender "por que houbo semellante carga policial".
"Non se saltou a valla nin se queimaron colectores. Grazas á tecnoloxía, hoxe en día hai gravacións nas que se ve que nin se tocou a valla nin se queimaron obxectos. Non entendemos por que pasou iso nin tampouco ninguén nos explicou de onde veu a orde", resolveu.
