A Xunta publicou este venres no Diario Oficial de Galicia (DOG) o anuncio polo que se convoca, para decembro e para xaneiro, aos titulares dos terreos necesarios para executar o novo itinerario de uso peonil entre Bamio e Carril, no concello de Vilagarcía de Arousa.
Trátase de impulsar a mellora da mobilidade peonil na intersección das estradas autonómicas PO-548 e PO-192. A actuación suporá un investimento de case 335.000 euros, incluíndo o pagamento dos 5 predios necesarios para executar a intervención.
O levantamento das actas previas á ocupación terá lugar o vindeiro día 12 decembro de 10.00 a 13.00 horas, no salón de plenos do Concello de Vilagarcía de Arousa; e a súa formalización, o 30 de xaneiro de 2024, no mesmo horario e lugar.
Ao tempo, a Xunta segue a avanzar nos trámites que permitan licitar e executar as obras. A actuación ten un prazo de execución de 5 meses.
O obxectivo desta intervención é resolver a configuración da intersección entre estas dúas vías autonómicas para favorecer a seguridade e mobilidade peonil entre estes núcleos do municipio arousán e a conexión co cemiterio municipal situado na proximidade.
En concreto, habilitarase un itinerario alternativo máis seguro e segregado do tráfico rodado. Na actualidade os veciños que se desprazan a pé entre Bamio e Carril fano pola beiravía das estradas PO-548 e PO-192, sendo necesario ademais para acceder ao cemiterio de Carril cruzar a PO-548, sen que exista na actualidade ningún cruzamento seguro acondicionado para iso. A escasa beiravía dispoñible na PO-192 e o tráfico elevado que circula pola PO- 548 implica que o percorrido resulte perigoso.
A nova senda posibilita a conexión a pé con seguridade entre Bamio e Carril, conectando as beirarrúas existentes nos extremos.
O percorrido aproveita un treito antigo de estrada que se acondiciona como paseo peonil, completándose a senda pola beira da PO-192 e do viario municipal da gasolineira. Deste xeito conséguese comunicar as parroquias de Bamio e Carril, dando acceso peonil ao cemiterio de Carril, considerado un foco de atracción de desprazamentos na zona. Con esta actuación, polo tanto, foméntase unha mobilidade sostible en condicións seguras.
![Plano de planta de situación do proxecto a executar. DS](/media/diariodosalnes/images/2023/11/10/2023111017560910977.jpg)
Máis en detalle, a actuación iniciarase onde finalizan as beirarrúas do Salgueiral, cruzan a estrada cun paso sobreelevado para non afectar a un petróglifo existente na beiravía. A partir deste punto a senda discorrerá en paralelo á PO-192 e ao viario municipal que dá acceso á gasolineira. O percorrido proseguirá polo viario municipal ata alcanzar o paso inferior que salva a variante de Carril (VG-4.7).
Unha vez pasada a estrutura, crúzase a calzada mediante outro paso de peóns sobreelevado para dirixirse a un camiño que se acondiciona con formigón coloreado e ancho de 2 metros, protexéndose o desnivel cunha varanda metálica. A continuación, o percorrido discorrerá sobre a estrada antiga ata alcanzar a beirarrúa existente en Carril.
Para acceder ao cemiterio de Carril é necesario cruzar a PO-548, sen que exista na actualidade ningún cruzamento seguro para isto. Para iso a intervención prevé un paso de peóns regulado mediante un semáforo con pulsador, ademais de complementar as escaleiras actuais cunha rampla executada mediante unha pasarela de madeira.
Ademais, para garantir a seguridade dos peóns no tránsito pola senda, a intervención complétase coa inclusión de iluminación pública: executarase un prisma con dous tubos de 63 mm con arquetas cada 100 m e báculos cada 25 m con altura 4 m.