A Policía Local de Vilagarcía estreou na mañá desde luns os novos coches patrulla adquiridos polo sistema de renting á firma Autos Iglesias. Tratase de tres vehículos híbridos novos, do modelo Ford Kuga ST-LINE 2.5 Duratec FHEV 14 KW (190 CV), e totalmente equipados cos sistemas regulamentarios para a prestación do servizo. Entre eles e como mellora ofertada polo adxudicataria, os coches están dotados con paneis luminosos para avisos. O contrato adxudicouse por 211.527 euros (IVE incluído) e un prazo de 48 meses.
As concelleiras de Seguridade Cidadá e Mobilidade, Tania García e Paola María, respectivamente, xunto do xefe da Policía Local e responsables da adxudicataria inspeccionaron os vehículos que xa están operativos.
Tal e como establecía o contrato, o concesionario entregou os coches convenientemente rotulados, dotados dos equipos luminoso e acústicos homologados, cos cristais escurecidos e equipados con lanternas, botiquín, extintor, prancha e barra de separación entre os asentos dianteiros e posteriores, con soporte de defensas policiais e emisora compatible co sistema de comunicación da Policía, navegador, cámara traseira e atención telefónica de mans libres, entre outros elementos. Igualmente, o adxudicatario correu cos gastos de matriculación e co seguro a todo risco de cada vehículo. Ademais, o contrato inclúe os servizos de mantemento e reparacións na propia concesionaria da marca.
