A Policía Local de Vilagarcía informou este venres das restricións de estacionamentos e dos cortes de tráfico que se levarán a cabo o domingo 20 de agosto con motivo da celebración do desfile de carrozas que dará comezo ás 21.30 horas e que discorrerá polo centro urbano.
Os estacionamentos nas zonas afectadas deberán quedar libres ás cinco da tarde para non entorpecer o paso das carrozas e os peches de rúas realizaranse co inicio do desfile e ata o seu remate.
As rúas polas que pasarán as carrozas e, polo tanto, se verán afectadas polas medidas mencionadas son: Moreira Casal, avenida Rosalía de Castro, Praza da Constitución, avenida Juan Carlos I, rúa Gumersindo Nartallo, Praza da Independencia, rúa Padre Feijó, Edelmiro Trillo e Praza de España.
A Policía xa colocará valas e carteis informativos nas vías afectadas. Os cortes de tráfico tamén restrinxirán o acceso de vehículos dos vaos permanentes, de aí que a Policía pida aos residentes e usuarios de garaxes destas zonas que sexan previsores á hora de fixar as súas chegadas e saídas para evitar a coincidencia co horario do desfile.
