O parque canino de Fexdega permanecerá pechado parcialmente a partir de este mércores e durante uns días co obxectivo de reconstruír o muro de peche que linda coa rúa Castiñeiro. A raíz do desprendemento dunhas pedras, tras comprobar o deteriorado estado no que se atopaba toda a construción, en lugar de arranxar unicamente a zona afectada o Concello optou por derribar toda a parede e construír un peche novo que ofreza todas as garantías de seguridade. A parte da instalación para mascotas situada no interior do recinto permanece operativa.
Persoal de Obras e do Servizo Municipal de Emerxencias procederon na mañá deste mércores ao derribo do muro e ao precinto das instalacións. O precinto das instalacións faise por motivos de seguridade dos propios cans, que poderían escaparse cara a estrada co conseguinte risco de ser atropelados por un vehículo ou provocar un accidente.
Os traballos de reconstrución do peche lateral comezarán o vindeiro luns, cando xa se disporá dos materiais e a maquinaria necesarias para efectuar a obra.