A substitución dunhas ventás no edificio situado fronte á Escola de Música, na avenida Juan Carlos I, obrigará a desviar a circulación en sentido Carril pola rúa Santa Lucía. Os vehículos que se dirixan cara Rosalía de Castro deberán bordear a mazá por Vila Janer e tomar por Moreira Casal para desembocar na rotonda do Ramal. As obras afectarán só a este sentido da circulación, xa que o tráfico en dirección a Pontevedra poderá seguir circulando por Juan Carlos I.
A alteración no tráfico comeza este mércores e manterase os días laborais ata o vindeiro luns, incluído, cando está previsto que remate a obra. O sábado e o domingo Juan Carlos I funcionará con total normalidade ao non traballar a empresa e retirar o camión-andamio que ocupa parte da vía. Igualmente, a circulación será a habitual en horario nocturno e durante o descanso para almorzar (entre as 12.30 e as 15 horas).
