O lavadoiro de Vilaxoán será restaurado para resolver as deficiencias que presenta

A Xunta de Goberno Local de Vilagarcía vén de dar o visto bo ao proxecto para restaurar o lavadoiro público de Vilaxoán e resolver as deficiencias que presenta na actualidade e que dificultan o seu uso. A execución precisa dun orzamento de 4.500 euros, nunha actuación coa que o executivo atende unha petición trasladada pola veciñanza da localidade.

Os traballos a realizar céntranse en garantir a estanquidade do vaso, xa que o principal problema que rexistra é a perda de auga. Esta situación impide o correcto funcionamento do lavadoiro e afea a imaxe do conxunto ao presentar unha pía baleira e, pola contra, un corredor completamente encharcado.

Unha limpeza xeral da construcción dará inicio á intervención, retirando as plantas, entullos e lodos acumulados. A continuación arranxaranse a esclusa e a canle de evacuación, e por último illaranse e selaranse as distintas zonas do lavadoiro.

A obra conta xa coa autorización da dirección xeral de Patrimonio da Xunta, trámite preceptivo xa que o lavadoiro de Vilaxoán é un elemento da arquitectura tradicional incluído no Catálogo Municipal de Bens a Protexer. Cumprido este requisito e unha vez habilitada a partida para o seu financiamento, contrataranse os traballos que teñen un prazo de execución de 15 días.