O Concello de Vilagarcía vén de recibir a confirmación da subvención para financiar unha nova edición do obradoiro de emprego Labora Xove, que este ano impartirá as especialidades de Enerxías Renovables e Socorrismo Acuático. A Concellería de Emprego iniciará nos vindeiros días o procedemento para a selección dos dezaseis mozos e mozas que poderán formarse a través deste programa durante os vindeiros doce meses. O proceso de selección realizarase a través do Servizo Público de Emprego, no que os interesados deben estar dados de alta como demandantes de emprego, ademais de estar inscritos no ficheiro do Sistema Nacional de Garantía Xuvenil.
O obradoiro Labora Xove está dirixido a mozos e mozas de 18 ou máis anos de idade e ten como obxectivo proporcionarlles formación especializada en profesións nas que existen nichos de emprego importantes. Deste xeito preténdese que melloren as súas condicións de empregabilidade e teñan un acceso máis doado ao mercado laboral.
O proxecto, que está previsto que comece a desenvolverse a partir do mes de setembro, terá unha duración de 12 meses. Nese tempo, os participantes estarán contratados polo Concello e percibirán o correspondente salario á vez que recibirán a formación teórica e práctica que lles permitirá obter a cualificación profesional necesaria para acceder ao mercado laboral a través dunha destas dúas profesións.
O obradoiro terá unha única etapa de formación, en alternancia co traballo ou a práctica profesional, para que os alumnos poidan obter os correspondentes certificados de profesionalidade, do Nivel 2 no que a Socorrismo Acuático se refire, e de Nivel 1 no de Enerxías Renovables. Na fase de aprendizaxe, o alumnado realizará traballos de interese social ou comunitario para o Concello a través dos departamento correspondentes (no Servizo Municipal de Emerxencias e na Fundación de Deportes, no primeiro caso, e nos servizos de Electricidade e Obras, no segundo.
Para o desenvolvemento deste novo obradoiro de emprego, o Concello conta cunha achega de 424.840 euros da Consellería de Economía, Emprego e Industria, aos que a administración local engad e outros 30.000 euros.
