Ravella abre este venres o prazo de solicitude das axudas ao estudo, tanto as dos niveis universitario e de ciclos superiores, como as relativas á Educación Infantil. Ao igual que nos últimos anos, a suma destinada a financiar estas medidas sociais increméntase ata acadar os 85.980 euros, o que supón un 10% máis que o ano pasado.
A principal novidade reside en que tamén se elevan as contías das respectivas bolsas, que pasan a ser de 425 e 225 euros para a primeira liña, e de 70 para a segunda. A revalorización responde ao necesario axuste á subida do custe da vida nos últimos tempos e ao obxectivo de que o complemento municipal contribúa a aliviar a carga ás familias con rendas máis baixas.
As axudas para a realización de estudos universitarios e de ciclos superiores de FP que se cursen fora do termo municipal deberán solicitarse a través da sede electrónica, cubrindo o formulario correspondente e presentando a documentación que se especifica nas bases da convocatoria, dispoñibles na mesma sede e na páxina web. O prazo para realizar o trámite remata o 30 de setembro.
Este ano o Concello dispón dunha partida de 66.800 euros para financiar esta liña de subvencións da que o curso pasado se beneficiaron 168 estudantes. Os principais requisitos para acceder a estas bolsas son, para os universitarios ou alumnos de nivel similar, que teñan cursado un mínimo de catro materias anuais ou 30 créditos por ano. Para os ciclos superiores esíxese que os estudos se realicen na modalidade de dedicación a tempo completo. En ámbolos dous casos, os solicitantes deben residir en Vilagarcía e estar empadroados cunha antigüidade mínima dun ano. Ademais, para recibir a achega terán que xustificar ter superado, polo menos, o 50% das materias nas que estivesen matriculados no curso 2022/2023. Quedan excluídos da convocatoria os estudos on-line.
As axudas municipais á escolarización están destinadas a alumnos de 0 a 6 anos matriculados en centros de ensino sostidos con fondos públicos e nas escolas infantís autorizadas en Vilagarcía. Poden optar a elas as unidades familiares de convivencia residentes e empadroadas no municipio. A contía a recibir polos beneficiarios será de 70 euros (10 máis que os anos anteriores). O Concello dispón dunha partida de 19.180 euros para financiar a medida da que o ano anterior se beneficiaron 274 nenos e nenas.
Neste caso, as solicitudes poderán presentarse tanto de forma telemática a través da sede electrónica como de xeito presencial no rexistro xeral do Concello. En calquera dos casos, o prazo remata o 30 de setembro. As bases e formularios tamén están dispoñibles na sede electrónica e na web municipal.
