Costas toma mostras na Concha-Compostela na procura de solucións contra o cadillo
Un equipo de técnicos da xefatura provincial de Costas do Estado e persoal da empresa Tragsa desprazáronse este luns ata a praia da Concha-Compostela co obxectivo de realizar os traballos de campo necesarios para determinar as actuacións a desenvolver para lograr erradicar a vaga de cadillo presente no areal dende hai uns anos. A visita responde ás xestións realizadas polo goberno local ante o departamento estatal demandando solucións para este problema, así como outras melloras nas praias do Preguntorio e Campanario.
O alcalde, Alberto Varela, e os concelleiros de Medio Ambiente, Diego García, e de Turismo, Álvaro Carou, acompañaron aos técnicos de Costas durante boa parte da mañá. Os traballos efectuados consistiron na realización de varias catas e na toma de mostras de area en distintos puntos e a distinta profundidade co obxectivo de concretar ata que nivel están presentes as sementes do cadillo. Estas boliñas estreladas cuxos pinchos se cravan nos pés, no calzado, nas rodas das bicicletas e mesmo nos patas e fouciños dos cans, estan causando grandes molestias aos usuarios da praia, tanto en verán como en inverno, ao tratarse dunha zona de esparexemento moi frecuentada durante todo o ano polos vilagarciáns.
Coas mostras tomadas, os técnicos terán que realizar os pertinentes informes e propoñer as medidas posibles a adoptar para actuar sobre o areal con obxectivo de acabar coa invasión de cadillo de xeito permanente, xa que as anteriores iniciativas levadas a cabo noutras campañas por Concello e Costas tiveron efecto a curto prazo, pero non evitaron que a especie invasora volvera a propagarse. O arranque das plantas ou a retirada manual dos pinchos foron algunhas das actuacións que se levaron a cabo sen acadar o éxito esperado, de aí que o executivo local volvese a xestionar ante o departamento estatal a procura de solucións definitivas.
Aproveitando a visita dos responsables da Xefatura de Costas, Varela Paz volveulle a lembrar a necesidade de acometer as outras melloras pendentes nas praias do Campanario e do Preguntoiro, tal como xa falaran o pasado mes de outubro, cando visitaron o areal de Bamio.