A Romaría dos Maiores regresa ao Concello de Vilagarcía o sábado 1 de xullo cun aforo para 500 comensais. O Concello recupera esta celebración despois de tres anos, un parón provocado pola pandemia. A Área de Persoas Maiores vén de abrir o prazo para a compra das entradas para quen desexe participar no xantar. Os demais actos son abertos e de balde para todos aqueles que queiran pasar unha xornada festiva e de baile.
A deste ano será a XVII edición da romaría dirixida a maiores de 65 anos ou pensionistas de 55 anos en diante. O número de prazas dispoñibles para asistir ao xantar é de 500, cuxas entradas poderán adquirirse ata o 23 de xuño no Concello (na zona de Alcaldía) ao prezo de 9 euros por comensal. O menú a servir componse de empanadas variadas, lagostinos cocidos, carne ao caldeiro con patacas, viños, augas e gaseosas, sobremesa, café e licores.
A festa en Fexdega comezará ás 12 do mediodía, hora á que se abrirán as portas do recinto. Antes do xantar actuará a Coral Rosalía de Castro e a sobremesa estará amenizada polos grupos da Asociación Cultural-Coro Virxe da Renda, que animará a sesión de baile.
A Concellería das Persoas Maiores organiza e subvenciona este encontro de verán a efectos de que os asistentes poidan gozar da xornada de diversión a un prezo asumible por todos os petos.
