O Concello contrata a reposición da cuberta do local da ANPA do colexio de Carril

Ravella adxudicou o pasado luns as obras de reposición da cuberta da antiga casa do conserxe do colexio de Carril cun investimento de 21.000 euros. A intervención municipal foi necesaria dada a gravidade do estado no que se atopaba a edificación, que estaba sendo utilizada pola ANPA, e que incluso presentaba risco de desprendementos, segundo o informe do técnico municipal. Tras ordenar a inspección do edificio por parte do Arquitecto Municipal e de reunirse coa dirección do centro e os membros da ANPA, o alcalde, Alberto Varela, comprometeuse a resolver o problema á maior brevidade.

A empresa César Paz será a encargada de acometer os traballos que comezarán nos vindeiros días e que teñen un prazo de execución de tres meses. As actuacións a realizar teñen como obxectivo poñer fin ás graves deficiencias do inmoble, onde aparecían "fendas ostensibles" que afectaban, sobre todo, á lousa inclinada da cuberta. O forxado tamén presentaba defectos nas armaduras, que estaban degradadas e provocaban unha perda da capacidade de resistencia. Por último, o material de cubrición carecía de illamento térmico e as fendas, ademais de provocar a filtración de auga e humidades ao interior do edificio, tamén comprometían a estabilidade dos propios elementos estruturais.

En base a iso, as obras contratadas consistirán en demoler a cuberta actual, formada por lousas inclinadas de formigón e acabado de t ella mixta, para proceder a instalar unha estrutura metálica formada por perfís de aceiro, coas dimensións necesarias para soportar as sobrecargas do peso propio dos materiais, do uso, e do vento.

A nova cuberta formarase con paneis sandwich composto por dúas chapas de aceiro prelacado e con illamento térmico. A obra inclúe a xestión dos refugallos resultantes dos traballos.