O pavillón do CIFP Fontecarmoa de Vilagarcía acolleu na mañá deste venres unha sesión de fitness a cargo de Domingo Sánchez como docente e, como alumnos, con 80 estudantes dos ciclos superiores de Acondicionamento Físico dese centro e máis do IES Laxeiro de Lalín, que acudiron convidados.
Esta actividade está promovida dende o departamento didáctico de Actividades Físicas e Deportivas do Centro Integrado de Formación Profesional Fontecarmoa, que procurou a presenza deste especialista e máis a colaboración entre as institucións.
En concreto, a sesión deste venres, de catro horas de duración, centrouse na mobilidade no fitness, core e mobilidade dinámica, exercicios de activación da cintura pélvica e cintura escapular e a estabilidade e mobilidade como medio do desenrolo da forza.
O xoves pola tarde foron seis profesores dos ciclos quen recibiron as leccións de Domingo Sánchez sobre mobilidade pasiva e dinámica, liñas funcionais e cadeas miofasciais, modificación de patróns posturais e progresións da estabilidade e forza muscular cara a construción de patróns de movemento dentro do fitness cun obxectivo principal da mellora da saúde. Os docentes están a seguir unha formación específica durante varios meses para continuar coa súa mellora profesional.
A presenza de Domingo Sánchez en Arousa espertou un notable interese xa que este experto en wellness conta cun amplo recoñecemento derivado dos seus libros sobre actividade física e saúde, adestramento, nutrición e pedagoxía.
