O programa de andainas Goza do Ulla fai escala en Vilagarcía o domingo 10 de setembro. O paseo programado no concello arousán consistirá nunha ruta de ida e volta entre o encoro do Con e o miradoiro da Cruz de Xiabre. A distancia total a cubrir é de 14 quilómetros, con dificultade media-alta e unha duración aproximada de catro horas. O percorrido discorrerá entre regatos e polos camiños que atravesan as ladeiras do monte dende as que se ofrecen espectaculares vistas da desembocadura do Ulla na ría de Arousa. Os interesados en participar nesta actividade de balde poden anotarse a través do mail [email protected].
O paseo vilagarciá iniciarase ás 9 da mañá no encoro do Con, nas inmediacións do Centro de Hidrobioloxía, lugar ata o que os participantes deberán desprazarse polos seus propios medios. Acompañados por guías, os camiñantes remontarán o curso alto do río Con ata chegar á área de recreo de Fontefría. Dende aí, tomarán polas sendas do monte dende as que se poden admirar magníficas panorámicas da desembocadura do Ulla na ría de Arousa, de Cortegada, terreo insular integrado no Parque Nacional das Illas Atlánticas, dos parques de cultivo da ameixa do Carril e dos campos de bateas de mexillón.
A medida que se vaia avanzando, as vistas iranse abrindo para descubrir o curso baixo do río, os bancos marisqueiros dos Lombos do Ulla e, xa no miradoiro da Cruz de Xiabre, para completar unha panorá mica de 360 graos que permite contemplar dende as terras de Padrón ás illas Cíes, si o día está claro, ata a comarca de Caldas, coa predominancia da ría de Arousa,
Tras un descanso no enclave do miradoiro, os sendeiristas emprenderán o regreso ao encoro do Con para dar por rematada esta nova etapa do programa Goza no Ulla, no que participan os municipios ribeiregos das provincias de Pontevedra e A Coruña.
