Produtos da comarca e paixón pola hostelería: As claves das ‘Recetas do Salnés’ 2.0

Cabala en escabeche, fideos con ameixas, empanada de millo con berberechos ou galo de curral de Meis son só algúns dos produtos e elaboracións entre as máis de 30 recetas que alberga o segundo volume do recetario creado por alumnado, profesorado e directiva do Obradoiro de Hostelería do Salnés, que se presentou este venres na súa sede de Sanxenxo cun showcooking no que o novo alumnado e tamén o da pasada edición que contribuiu á creación do libro, estivo arroupado por alcaldes en funcións e representantes das institucións vencelladas á Mancomunidade do Salnés, que promoveu a iniciativa a través dunha subvención da Consellería de Promoción de Emprego e Igualdade.

Durante a mostra, os asistentes puideron gozar de varios dos pratos estrela que inclúe o volume ‘Recetas do Salnés’, distribuido en entrantes, postres e bebidas, e pratos principais a base de fideos, carnes, peixes e mariscos, cun toque moi especial: todos os pratos están feitos a base de produtos da comarca. E non só. Tamén as bebidas, coma o mojito de Albariño ou a sangría con tinto de Barrantes son todo un selo de calidade comarcal.

"É un proxecto custoso, que levou moito tempo porque fixemos todo nós, dende o Obradoiro de Hostelería, apoiados por FEPRAGAL, que nos cedeu un fotógrafo. Pero cremos que o resultado e moi bo, e foi un orgullo contar co alumnado. Un gran número dos que participaron na elaboración do libro, que son os da edición pasada, acudiron á presentación, tendo en conta que todos están xa traballando. É un proxecto moi especial", sinalou a directora do Obradoiro de Hostelería, Carmen Germade.

Na composición das recetas, ademais do alumnado de cociña e sala, participou a docente de Sala, Pilar Amoedo, e o docente de Cociña, Paco Canedo.

O volume distribuirá as súas 750 copias polos municipios do Salnés e poderase obter de xeito dixital a través da web da Mancomunidade do Salnés.