Nun acto celebrado este mércores no Salón de Plenos do Concello de Ribadumia, as concelleiras Mar Rey e Vanesa Jorge fixeron entrega do premio da primeira edición do Concurso de Fotografía Balance de Tintos. O premio constaba dun diploma conmemorativo e 100€ en metálico.
O gañador desta edición inaugural foi o fotógrafo Xosé Rañó Bueno, cuxa obra cativou ao xurado, pois coa súa participación reflectiu con creatividade a esencia da celebración vinícola. O goberno local mostrou a súa gratitude con todos os participantes e espera continuar promovendo iniciativas artísticas e culturais que enaltezan a identidade local.
Balance de Tintos, como nome de concurso, fai eco da tradición vinícola e o significado que o viño tinto ten para Ribadumia. Esta primeira edición contou cunha boa participación, da que se tiveron que descartar algunhas propostas por non cumprir as bases, e da que Xosé Rañó se fixo co premio coa súa fotografía Universo Tinto.
O Concello de Ribadumia trasladou os seus parabéns a este veciño de Vilagarcía de Arousa por compartir o seu talento e paixón pola fotografía e plasmalo no concurso, así como a todos os participantes desta primeira edición.
