A directora xeral de Desenvolvemento Pesqueiro, Susana Rodríguez, participou este venres na presentación do proxecto A Toxa Re-vive da asociación Autismo BATA, que se realizou ao abeiro da estratexia do GALP Ria de Arousa. Esta iniciativa, dotada con máis de 83.180 euros de apoio da Consellería do Mar e do Fondo Europeo Marítimo, de Pesca e Acuicultura (Fempa), permitiu que a través da Formación Dual dirixida a persoas con autismo e/ou discapacidade intelectual se preparase a oito operarios para a recuperación e conservación do patrimonio marítimo- terrestre que farán traballos no monte central da Illa da Toxa.
Susana Rodríguez aproveitou a súa intervención para felicitar aos novos operarios, a asociación BATA e ao GALP, animándoos a que desenvolvan novos proxectos e destacando o acerto de apostar pola Formación Dual, na que se aprende traballando.
